lirik lagu giraut de bornelh – non puesc sofrir
no posc sofrir c’a la dolor
de la den la lenga no vir
e.l cor ab la novela flor
lancan vei los ramels florir
e.lh chan son pel boschatge
dels auzeletz enamoratz
e si tot m’estauc apensatz
ni pres per malauratge
can vei chans e vergers e pratz
eu renovel e m’assolatz
qu’eu no m’esfortz d’altre labor
mas de chantar e d’esjauzir!
c’una noch somnav’en pascor
tal somnhe que.m fetz esbaudir
d’un esparver ramatge
que m’era sus el ponh pauzatz
e si.m semblav’adomesgatz
anc no vi tan salvatge
mas pois fo maners e privatz
e de bos getz apreizonatz
lo somnhe comtei mo senhor
c’a son amic lo deu om dir
e narret lo.m tot en amor
e dis me que no.m pot falhir
que d’oltra mo paratge
no m’aia tal ami’en patz
can m’en serai pro trebalhatz
c’anc om de mo linhatge
ni d’oltra ma valor assatz
non amet tal ni.n fon amatz
era n’ai vergonh’e paor
e.m n’esvelh e.n planh e.n sospir
e.l somnhe tenh a gran folor
e no cut posch’endevenir!
pero d’un fat coratge
no pot partir us rics pensatz
orgolhos e desmezuratz
c’apres nostre passatge
sai que.l somnhes sera vertatz
aissi drech com me fo narratz
e pois auziretz chantador
e chansos anar e venir
qu’era, can re no sai m’assor
me volh un pauc plus enardir
d’enviar mo messatge
que.ns porte nostras amistatz
que sai n’es facha la meitatz
mas de leis no n’ai gatge
e ja no cut si’achabatz
nuls afars, tro qu’es comensatz
qu’eu ai vist acomensar tor
d’una sola peir’al bastir
e cada pauc levar alsor
tan josca c’om la poc garnir
per qu’eu tenh vassalatge
d’aitan, si m’o aconselhatz
e.l vers, pos er ben assonatz
trametrai el viatge
si trop qui lai lo.m guit viatz
ab que.s deport e.s do solatz
e s’eu ja vas emperador
ni vas rei vauc, si.m vol grazir
tot aissi com al seu trachor
que no.l sap ni no.l pot gandir
ni mantener, ostatge
me lonh en us estranhs renhatz
cais si serai justiziatz
e fis de gran d~mnatge
si.l seus gens cors blancs e prezatz
m’es estranhs ni m’estai iratz
e vos entendetz e veiatz
que sabetz mo lengatge
s’anc fis motz cobertz ni serratz
s’era no.ls fatz ben esclairatz
e sui m’en per so esforsatz
qu’entendatz cals chansos eu fatz
Lirik lagu lainnya:
- lirik lagu getsweet – сожалею (i’m sorry)
- lirik lagu honeythehustler – moonwalk
- lirik lagu zpluto & ben briddon – intro
- lirik lagu 85hz – fuckd yo moms lol
- lirik lagu joe tex – you can stay
- lirik lagu fabolous & jim jones – rich hustle
- lirik lagu the archers (group) – truth, peace and joy
- lirik lagu mila j – welcome to the west
- lirik lagu queezy_the_gangster – valentino (remix)
- lirik lagu triox4 – família buscapau (lil careca version)