lirik lagu الجوكر - zatak - ذاتك - el joker
[المقطع الأول]
ما بنشتكيش من الحمول طول ما فينا أكتاف
لولا شيلنا شيلة تقيلة كان زماننا خفاف
ناس كتير بتقول الناس بتقول، قليل شاف
قالي يا عمو خايف، قلت عندك حق تخاف
ما تقولش هروح وهاجي، الحظ لا يؤتمن
لما بنغلط نفس الغلطة ما بندفعش نفس التمن
عشان في ناس باقي في نصيبها وناس خدوه مقدمًا
وناس خدت بزيادة، بس هيدور عليها الزمن
آه، ما بتتحسبش بورقة وقلم
وجعنا مش زي بعضه لو أكلنا نفس القلم
بس هي هي نفس الذئب ونفس الغنم
رسايل للفضاء، قابلني لو مخلوق إستلم
حاسس إن عمري ألف عام
يا ترى بعد التعويم الألف شمعة تعمل كام؟
الدنيا بتلعب بيا وبلعب بالكلام
فكك من الفهلوية، ما فيش أهم من العلام
[اللازمة]
تصالح مع ذاتك
إنت مش متأخر مهما فاتك
تسامح مع ذاتك
حتى لو إختياراتك سبب معاناتك
[المقطع الثاني]
الملطوط يحب يلط الناس معاه
لو كله تاه ما حدش تاه
لو ما فيش مرتاح ما فيش حد في معاناة
ممكن يطلب مساعدة، بس لا، السواد عماه
كل الناس في عينيه أداة، حتى أكتر ناس حباه
آه، بس لكل وحش هبة
ع المدى الطويل ما فيش حاجة بتستخبى
والناس ما بتتغيرش لو مش حابة
ومش أسوأ سيناريو إنك ناديت ما حدش لبى
وارد تاكل بالجزم، صعب تفرد عودك وسط حزم
في ناس ودانها في خزن جوة خزن
إذًا، خف من التعصب
في الغالب أما تحزق جامد بيقل التأثر
ساعات حتى الضمير لازم تكبحه
لأ، مش كل باب تفتحه
ده حتى اللي فهموا ونحوا هيجي وقت ويجنحوا
قلت وحماس الشباب مخدرني
هغير العالم، العالم غيرني
[اللازمة]
تصالح مع ذاتك
إنت مش متأخر مهما فاتك
تسامح مع ذاتك
حتى لو إختياراتك سبب معاناتك
[المقطع الثالث]
ناس أحسن من اللي بينا في الزحمة تاهوا منا
مع إن ما كانش بينا خلاف ولا هما فيهم إنا
ده حال الدنيا، ساعات بتكون غريبة سنة
ساعات نخربها فتبرأنا ونمشي صح تدينا
آه، بس أكيد الحسبة ظابطة
حاجات مربوطة ببعض وإحنا مش شايفين الرابطة
ما تجيش على نفسك، المادة مش بتطبطب
الناس ماشيين بسرعة، مش أمان، إنت مش أبطأ
فركز، وإختار بعناية الوسط
خلي بالك الشمال بيقولوا ع الشمال وسط
ما حدش بياكل إلا بطنه مهما حصد
ولكل ظاهر معنى ظاهر مهما صاحبه قصد
لو نفسك سليمة وسط نفوس لئيمة
يبقى إنت في مكان غلط، قوم بينا
التمثيل كذب برة السيما
في حد دايمًا فوقينا
ساعات تيجي الهزيمة في شكل فوز لينا
إوعى يعميك نور المدينة
[اللازمة]
تصالح مع ذاتك
إنت مش متأخر مهما فاتك
تسامح مع ذاتك
حتى لو إختياراتك سبب معاناتك
[جسر]
بعيش بالأكتر والأقل، دايمًا بلاقي حل
مؤمن إن عمر الميزان ما إختل
لما الشمس غربت قمر هل
ومش صدفة، لما تهت بدون أدلة قلبي دل
[المقطع الرابع]
لكن للأسف، في ناس مش شايفة إنها مش شايفة
جاوبوا كل أسئلة ليه، لكن بإجابة كيف
بيقولوا الصورة الكبرى للنصيب كذبة زايفة
من إختراع عقول من عشوائية الدنيا خايفة
زمان أنا كمان غرقت في الحجج وفي الردود
فاكر إن ده المفروض عشان يصح نكون شهود
لكنه كان طريق مسدود، خلاف دايمًا موجود
لإن ما فيش دليل خلى رأي يسود ورأي يموت
بس ده الإيمان، فاهم؟ إن العالم محدود
كان هيبقى علم مش إيمان لو قابل للثبوت
بس ليه إتخيلنا الما لا نهاية والعالم معدود؟
وليه بنموت، ياكلنا الدود وظهرت فكرة الخلود؟
وليه بنحس إن السما بتتكلم؟
وناس مشيت من زمان بتبتسم وتسلم
مين اللي بيقوينا أما بنتألم؟
النور مش في المخ، في القلوب مهما نتعلم
[اللازمة]
تصالح مع ذاتك
إنت مش متأخر مهما فاتك
تسامح مع ذاتك
حتى لو إختياراتك سبب معاناتك
[المقطع الخامس]
شكرًا لناس رجعولنا الثقة بعد ناس نقم
كانت علاقات مرهقة، نفسيًا محرقة
علاقات مربكة، بدون ما تكون حتى مدركة
بتدمر بالفطرة زي تور بيجري في الأروقة
شكرًا ع العلامات اللي أرشدت كل شخص حاد
عن الطريق وكاد يتوه، لكن شافها ورجع وفاد
زي ما إستفاد فهم بشكل بات إن إحنا مش آحاد
مش حيوانات، ولا في حياة بعض ستبات
شكرًا لناس بساط بدون تكلم وإستطراد
في قلوبهم إيمان فاض فشال من ع العينين رباط
بدون تكلف وإستعراض، ولا مزايدة، ولا أمراض
ولا كان ليهم أي أغراض، نفوس بيضا وشعت بياض
شكرًا على ثباتك في أسوأ حالاتك
وعلى عدم مغالاتك في مطاردة ملذاتك
شكرًا على جهادك في سبيل تحسين عاداتك
شكرًا على إن حياتك مش على حساب إخواتك
[اللازمة]
تصالح مع ذاتك
إنت مش متأخر مهما فاتك
تسامح مع ذاتك
حتى لو إختياراتك سبب معاناتك
Lirik lagu lainnya:
- lirik lagu tume sod - carding / smart
- lirik lagu joan - alibi
- lirik lagu simplejosh - praise god
- lirik lagu milli - sick with it
- lirik lagu кирил (kiril) (bgr) - страх (strah)
- lirik lagu wildkarduno - trouble
- lirik lagu ibrahim tatlıses - bir taş attım pencereye
- lirik lagu ghizela rowe - the curse upon edward - thomas gray
- lirik lagu peepjesus - off the muscle
- lirik lagu eleni de roze - παλόμα (paloma)